Veer, Optoch Kommitee Zitterd, hòbbe mit druifheid kènnis mòtte numme van ’t sjterve van òs gewaardeierd eerelid Sjuul Paques.
Sjuul, eine richtige Zittesje sjnaak, gebaore en getaoge mit ’t vastelaovesbloud in zien aore. ’t Waar dan ouch neit verwònjerlik dat hae in 1949 woort benuimp pès Sjtadsprins van Zitterd, Prins van ’t Marotteriek. Zien Prinssjap waar ’t begin van eine lange en verdeinstelik vereinigingslaeve.
Bie de Auw Prinse haet hae neit allein es sikkertaaris gesjitterd, mer ouch dees vereiniging oppe kaart gezat mit de alòmbekènde Grosse Nòmmer, woo hae jaore lank de kar trok op zien eige humoristiese meneier: Op dezelfde wies haet hae ouch jaor in jaor oet de Zittesje Revuu geprizzenteierd en groot gemaak.
Naeve alle anger vereinigingsaktiviteite bleef veur Sjuul de Vastelaovend toch baovenaan sjtaon en haet hae saer 1973 pès 1994 zònger òngerbraeking Optoch Kommitee Zittterd gedeind en in zien periode zeen door de toenmalige leede 2 optochhalle neiergezat.
In 1980 woort Sjuul sikkertaaris van òs kommitee en leit al gauw blieke dat dit ein fuksie waar, die hööm op ’t lief sjtòng gesjreeve. Laote veer aevel neit de optochte vergaete went hae waar eine meister in ’t ineinsjtevele van dit jaorliks gebeure.
Sjuul waar eine aktiveling, koos aevel ouch geneite van de Vastelaovend en veural van ’t sjlachte mit of zònger maske en wie hae mit zien vrunj van ’t optochkommitee es klossjaar op vastelaovesdaensdig door Zitterd tròk.
De Marotte höbbe de verdeinste van Sjuul beloond mit de benuiming van “Kommandöör in de Orde van de Pappegey” en veer, Optoch Kommitee Zitterd, höbbe Sjuul bie zien aafsjeid in 1994 benuimp pès eerelid. Veer zeen blie dat veer nog heel get jäörkes nao zien aafsjeid saame höbbe mage geneite en zeen Sjuul dan ouch neit allein dank versjöldig veur ziene inzats, mer zeeker ouch veur zien onvergaetelikke vrundjsjap.
Veer wunsje Lene, de kènjer en kleinkènjer gans vööl sjterkde bie ‘t verwirke van dit sjwaor verleis en richte òs nog einmaol pès Sjuul mit de weurd:
Sjuul, doe waars ein vereinigingsman in hart en neier
òm mit dich saame te wirke waar ein groot plezeier.
Wirke aan de Vastelaovend zònger vööl behey
diene inzats waar ein veurbeeld veur òs alleney.
Diene vrundjsjap, diene humor, diene lach en dien traon
dat alles is noe verbie, jao dat is noe veur goud gedaon.
Programmaboekje Optocht 
